Մուբարաքը ներկայացել է դատարան` դարձյալ սայլակով

Եգիպտոսի նախկին նախագահ Հոսնի Մուբարաքը տեղափոխվել է ոստիկանական ակադեմիա, որտեղ այսօր անցկացվում է նրա գործով երկրորդ դատական նիստը: Նախկին նախագահը մեղադրվում է այս տարվա փետրվարին ցուցարարների սպանությունների մեջ:

Ինչպես փոխանցում է Reuters-ը, տեղական պետական հեռուստաալիքը կադրեր է ցուցադրել, թե ինչպես է 83-ամյա Մուբարաքին տեղափոխող ուղղաթիռը վայրէջք կատարում դատարանի շենքին մոտ, այնուհետեւ նրան դուրս են բերում սայլակով:

Առաջին դատական նիստի ընթացքում էլ Մուբարաքը սայլակի վրա պառկած է եղել եւ դատավորի հարցերին պատասխանելիս հայտարարել է իր անմեղության մասին:

Առաջին նիստից հետո, որը տեղի ունեցավ օգոստոսի 3-ին, Մուբարաքին տեղափոխեցին հիվանդանոց: Եվ դրանից հետո դատարանի շենքի մոտ Մուբարաքի հակառակորդների եւ համախոհների միջեւ բախումներ սկսվեցին: Ի դեպ, այսօր նույնպես բախումներ են եղել երկու կողմերի միջեւ: