Իրանը սպառնում է Ադրբեջանին

Ադրբեջանը որեւէ խնդիր չի տեսնում Թուրքիայի հետ այցագրային ռեժիմը երկկողմանիորեն վերացնելու հարցում, սակայն դրան դեմ է Իրանը. թուրքական «Զաման» թերթին տված հարցազրույցում ասել է Ադրբեջանի նախագահի աշխատակազմի հասարակական-քաղաքական հարցերի բաժնի պետ Ալի Հասանովը:

Ըստ նրա` Իրանը պահանջել է, որ Ադրբեջանն իր հետ նույնպես վերացնի այցագրային ռեժիմը, հակառակ դեպքում սպառնացել է փակել Ադրբեջանի եւ Նախիջեւանի միջեւ միջանցքը: Հետեւաբար, Ադրբեջանը ստիպված է երկու երկրների հետ այդ պայմանագրերը միաժամանակ կնքել, թեեւ Հասանովը չի կարծում, որ Ադրբեջանի իշխանությունները պատրաստ են վերացնել այցագրային ռեժիմը միանգամից երկու երկրների հետ։

Ադրբեջանցի պաշտոնյան նաեւ մտահոգություն է հայտնել` Իրանից թմրանյութերի թրաֆիկի հետ կապված. «Իրանից Ադրբեջանի տարածքով ապօրինաբար Եվրոպա է արտահանվում մոտ 300 տոննա թմրանյութ։ Հնարավոր է լինում բռնագրավել միայն 5-10 տոննան։ Այդ ամենի հետևանքով Ադրբեջանի երիտասարդների շրջանում տարածվում է թմրամոլությունը»:

Ըստ նրա` դա էլ է պատճառ, որ Իրանի հետ այցագրային ռեժիմի վերացումը չհամապատասխանի Ադրբեջանի ազգային շահերին: Բացի այդ` Իրանում քաղաքական անկայուն իրավիճակը կարող է նպաստել փախստականների հոսքին Ադրբեջան: