Կահիրեում դարձյալ անհանգիստ է

Երկրորդ օրն է` Կահիրեի Թահրիր հրապարակում շարունակվում են ժողովրդական հուզումները:

Ոստիկանությունը եւ անվտանգության ուժերը չեն կարողանում ցրել չարտոնված հանրահավաքը: Նրանք կիրառում են արցունքաբեր գազ, ջրցան մեքենաներ, մահակներ: Ավելի քան 600 մարդ վիրավոր է, նրանցից 515-ը գտնվոմ են հիվանդանոցում. տեղեկացնում է mignews.com-ը:

Անկարգությունները սկսվել են այն բանից հետո, երբ ոստիկանությունը ցրել է հունվարի 25-ին անվտանգության աշխատակցի կողմից սպանված ակտիվիստի հարազատների ցույցը: Նրանք պահանջել են, որ արդար դատավարություն իրականացվի եւ պատժվեն բոլոր նրանք, ովքեր այս տարվա փետրվարին հրամայել էին մարտական փամփուշտներով կրակել ժողովրդի վրա, ինչի արդյունքում զոհվել էր 800 մարդ:

Թահրիր հրապարակում հավաքվածները պահանջում են Եգիպտոսում ներկայումս իշխող ռազմական խորհրդի ղեկավար Հուսեյն Թանթաուիի հրաժարականը նույնքան էնտուզիազմով, ինչպես մի քանի ամիս առաջ պահանջում էին Հոսնի Մուբարաքի հրաժարականը: