Ահմադինեժադին կախաղան է սպառնում

Իսլամական հեղափոխության պահապանների կորպուսի հրամանատար Մոհամեդ Ալի Ջաֆարին վերջերս դիմում է գրել Իրանի գերագույն հոգեւոր առաջնորդ այաթոլլա Ալի Խամենեիին` երկրի նախագահ Մահմուդ Ահմադինեժադի ձերբակալության խնդրանքով. ըստ mignews.com-ի` երեկ հայտարարել է Խամենեիի ներկայացուցիչ, այաթոլլա Աբդոլնաբի Նամազին:

Ըստ նրա` Խամենեին հրաման է տվել ձերբակալել բոլոր նրանց, ովքեր մասնակից են իր դեմ ուղղված հեղաշրջման փորձին, բացառությամբ Ահմադինեժադի: Սակայն, ըստ Նամազիի, նախագահը նախազգուշացում է ստացել:

«Հնարավոր է, որ նախագահի եւ Խամենեիի տարաձայնությունները հանգեցնեն պետության ղեկավարի հրաժարականին»,- հավելել է նա:

Ի դեպ, Իրանի օրենքներով` գերագույն հոգեւոր առաջնորդի դեմ դավադրությունը հավասարեցվում է պետական դավաճանությանը, որի համար սահմանված պատիժը կախաղան բարձրացնելն է: