Ֆրանսիայի նախկին արտգործնախարարն ընդդեմ ՆԱՏՕ-ի

Ֆրանսիայի նախկին արտգործնախարար Ռոլան Դյուման այցելել է Լիբիա եւ հայտարարել, որ պատրաստ է դատարանում հանդես գալ ՆԱՏՕ-ի դեմ մեղադրանքով` ռմբակոծություններից տուժածների անունից:

Ինչպես տեղեկացնում է gazeta.ru-ն, նա նաեւ ասել է, որ պատրաստ է պաշտպանել Լիբիայի առաջնորդ Մուամար Քադաֆիին, եթե նա կանգնի Հաագայի միջազգային քրեական դատարանի առջեւ: «Եթե նա ինձ խնդրի, իհարկե, այո: Սակայն չեն կարծում, որ դա տեղի ունենա»,- պարզաբանել է Դյուման:

Նա պատմել է, որ լիբիական հիվանդանոցներում տեսել է ՆԱՏՕ-ի ռմբակոծություններից տուժած մի քանի խաղաղ բնակիչների, իսկ բժիշկների հավաստմամբ` նրանց թիվը մոտ 20 հազար է:

Դյումային Լիբիայում ուղեկցել է հայտնի ֆրանսիացի փաստաբան Ժակ Վերջեսը, ըստ որի` իր նպատակն է բացահայտել այն մարդասպաններին, որոնք պատասխանատվություն են կրում օդային հարվածների համար, թեեւ ՆԱՏՕ-ն վստահեցնում է, որ հարվածներն ուղղված են բացառապես ռազմական նշանակետերին:

 Ի դեպ, Դյուման եւ Վերջեսը Տրիպոլիում հայտարարել են, որ դատական հայց են ներկայացնելու նաեւ Ֆրանսիայի նախագահ Նիկոլա Սարկոզիի դեմ: