Վրաստանում ակներեւաբար խախտվել են մարդու իրավունքները

Թբիլիսիում եւ Բաթումում ցուցարարների հանդեպ իրականացված գործողությունները մարդու հիմնարար իրավունքների եւ ազատությունների ակներեւ խախտումներ են. այսօր հայտարարել է ՌԴ ԱԳՆ մարդու իրավունքների, ժողովրդավարության եւ իրավունքի գերակայության հարցերով լիազոր Կոնստանտին Դոլգովը:

Ռուսաստանցի դիվանագետը հավելել է, որ եթե Վրաստանի իշխանությունները շարունակեն ուժային մեթոդների կիրառումը, դա կհանգեցնի իշխանություն-ընդդիմություն հարաբերությունների հետագա սրմանը եւ երկրի ապակայունացմանը. տեղեկացնում է «Ինտերֆաքսը»:

Հիշեցնենք, որ կիրակի օրը Վրաստանում ընդդիմությունն անցկացրել էր ցույց` պահանջելով նախագահ Միխեիլ Սահակաշվիլու հրաժարականը: Ոստիկանները ցրել էին ցույցը` կիրառելով ռետինե փամփուշտներ եւ արցունքաբեր գազ: Ընդդիմության առաջնորդ, խորհրդարանի նախկին խոսնակ Նինո Բուրջանաձեն ասել էր, որ բախումը ոստիկաններն էին հրահրել: