ՆԱՏՕ-ն ռմբակոծել է լիբիական ռազմանավերը

ՆԱՏՕ-ն շարունակում է ավիահարձակումները Լիբիայի մայրաքաղաքի եւ խոշոր նավահանգիստների վրա:

France Presse-ի տվյալներով` այս գիշեր ՆԱՏՕ-ի ինքնաթիռները ռմբակոծել են լիբիական ռազմածովային ուժերի 8 նավ, որոնք կանգնած են եղել Տրիպոլիի, Ալ Հումսայի եւ Սիրտի նավահանգիստներում:

ՆԱՏՕ–ի ներկայացուցիչները նշել են, որ գործողությունն իրականացվել է «խաղաղ բնակիչներին պաշտպանելու և ծովում ՆԱՏՕ–ի ուժերի անվտանգությունն ապահովելու նպատակով»։  Իսկ ՆԱՏՕ-ի գլխավոր քարտուղար Անդերս Ֆոգ Ռասմուսենը հայտարարել է, որ Լիբիայի վրա ռազմական եւ քաղաքական ճնշումները, ի վերջո, հանգեցնելու են Քադաֆիի ռեժիմի տապալմանը:

Ի դեպ, երեկ պաշտոնական Տրիպոլին հայտարարել էր, որ բանակցությունների շրջանակներում պատրաստ է իր զորքերը դուրս բերել քաղաքներից, եթե նույնը անեն նաեւ ապստամբները: Կառավարության պաշոտնական ներկայացուցիչ Մուսա Իբրահիմը նշել էր, որ զինադադարի պայմաններից մեկն էլ ՆԱՏՕ-ի ավիահարձակումների դադարեցումն է: