Ռումբ` օդանավակայանում

Այսօր` ժամը 15.42-ին, Հայաստանի արտակարգ իրավիճակների նախարարության Ճգնաժամային կառավարման կենտրոնում Երեւանի Կենտրոն ոստիկանության հերթապահ մասից տեղեկատվություն է ստացվել, որ անհայտ քաղաքացու ահազանգի համաձայն` Երեւանի «Զվարթնոց» օդանավակայանում ռումբ է տեղադրված:

Արտակարգ իրավիճակների նախարարությունից տեղեկացնում են, որ ահազանգը ստացվել է 30-35 տարեկան տղամարդուց` անհայտ հեռախոսահամարից: Դեպքի վայր են մեկնել արտակարգ իրավիճակների նախարարության, ոստիկանության, ազգային անվտանգության ծառայության աշխատակիցները եւ պաշտպանության նախարարության սակրավորները:

Օդանավակայանի տարածքը շրջափակված է, մարդկանց տարհանել են: Ներկա պահին որոնողական աշխատանքները շարունակվում են: