Ձերբակալել են Վաշինգտոնի քաղաքապետին

Երեկ վաշինգտոնյան Կապիտոլիումը պաշտպանող ոստիկանները ձերբակալել են Վաշինգտոնի քաղաքապետ Վինսենտ Գրեյին եւ քաղաքային խորհրդի 5 անդամների. տեղեկացնում է The Washington Post-ը:

Բարձրաստիճան պաշտոնյաները մասնակցել են բողոքի ակցիայի, որի ընթացքում ավելի քան 200 պաշտոնյաներ եւ հասարակական ակտիվիստներ փակել են դեպի Սենատ տանող ճանապարհը: Նրանք բողոքել են Օբամայի վարչակազմի հետ համաձայնության եկած Ներկայացուցիչների պալատի որոշման դեմ, որը վերաբերում է 2012 ֆինանսական տարվա բյուջեի նախագծին, մասնավորապես` քաղաքային մի քանի ծրագրերի ֆինանսավորման կրճատմանը:

Ոստիկանները բողոքի ակցիայի մասնակիցներին թույլատրել են փողոցում նստել մոտ 30 րոպե, ապա սկսել են ձերբակալել նրանց: Վաշինգտոնի քաղաքապետը նույնպես նստած է եղել մյուս բողոքողների կողքին:

Սենատը բյուջեի նախագիծը քննարկելու է ապրիլի 14-ին: