Կարեւոր իրադարձություն

ՀՀ կրթության եւ գիտության նախարար Արմեն Աշոտյանը օրերս Վրաստան կատարած այցից վերադարձել է կրթական ոլորտի հետ կապված մի շարք գաղափարներով:

Այսօր լրագրողների հետ հանդիպման ժամանակ նախարարը նշեց, որ Վրաստանի հայկական դպրոցներում բողոքում են հայերեն գրքերի թարգմանության որակից: Այդ իսկ պատճառով այսուհետ, մինչեւ հրատարակելը, հայերեն գրքերը կուղարկվեն Հայաստան, որպեսզի մեր մասնագետները սրբագրեն ու խմբագրեն դրանք:

Ա.Աշոտյանը նաեւ նշեց, որ Հայաստանը կշարունակի հայկական դպրոցներին ուսումնակրթական, գիտական, մեթոդական աջակցություն ցուցաբերել` գրականություն եւ այլ կրթական պարագաների մատակարարելով:

«Իմ գործընկեր եւ ընկեր վրաց նախարարը մամուլի ասուլիսի ժամանակ պաշտոնապես հայտարարեց, որ այս ուսումնական տարվանից վերականգնվում է հայոց լեզվի լիարժեք դասավանդումը»,- ուրախությամբ նշեց նախարարը:

2010-ին Վրաստանից շուրջ հարյուր հայ ուսուցիչ վերապատրաստվեց Հայաստանում, այս տարի եւս հարյուրից ավելի ուսուցիչներ կվերապատրաստվեն` արդեն Վրաստանում:

«Այս փոխադարձ հետաքրքրությունն իրականում շատ կարեւոր է»,- ասաց նախարարը: