Լիբիան չի մնա թուրքերին

Երեկ Լիբիայի պետական հեռուստատեսությամբ ելույթ է ունեցել երկրի առաջնորդ Մուամար Քադաֆիի միջնեկ որդին եւ Լիբիայում ծագած խռովությունների համար մեղադրել սիոնիստական ու օտարերկրյա ուժերին:

Նա նաեւ նշել է, որ իրենք պայքարելու են մինչեւ վերջ եւ ոչ մի դեպքում չեն թողնելու իրենց երկիրը թուրքերին կամ իտալացիներին: Կրտսեր Քադաֆին խոստացել է նաեւ հաշվեհարդար տեսնել խռովություն հրահրած բոլոր անձանց հետ:

Ավելի վաղ երկրում խռովություններ հրահրելու եւ սիոնիստական ուժերին ծառայելու մեղադրանքով արդեն ձերբակալվել են օտարերկրացիներ, այդ թվում` թուրքեր:

Ի դեպ, Թուրքիայի քաղաքացիներին Բենգազիից հայրենիք տեղափոխելու համար ուղարկված ինքնաթիռը վերադարձել է առանց ուղեւորների. լիբիական իշխանությունները թույլ չեն տվել նրան վայրէջք կատարել. տեղեկացնում է «Անադոլու» գործակալությունը: