Կապրենք՝ կտեսնենք

Ըստ ՊԵԿ-ի նախագահ Գագիկ Խաչատրյանի հրամանի Դեկտեմբերի 1-ից  հնարավորինս սահմանափակվելու է հարկատու-հարկային մարմին շփումը և  ոլորտում կարգ ու կանոն է հաստատվելու: Հաճելի լուրը լրագրողներին ավետեց  ՊԵԿ նախագահի տեղակալ Արմեն Ալավերդյանը :

Ըստ Ալավերդյանի՝ հրամանով  հենց այնպես, հետաքրքրության, ինչ-որ բան պարզելու համար հարկային աշխատակիցներն իրավունք չունեն հարկ վճարողներին կանչելու տեսչություն: Հաճախ  հարկ վճարողների սպասարկման բաժիններում մարդկանցից ավելի շատ փաստաթղթեր են պահանջվում, քան սահմանված է օրենսդրությամբ։ ՊԵԿ նախագահի հրամանով հանձնարարված է վերացնել նաև այս արատավոր երևույթը։

Ավելին` ՊԵԿ ղեկավարությունը նաև ուշադիր հետևելու է հարկային ծառայության աշխատակիցների պահվածքին։ «Մենք ունենք շատ լավ աշխատակիցներ, որոնց հասցեին գովեստի խոսքեր ենք լսում։ Բայց ունենք նաև աշխատողներ, ովքեր իրենց պահվածքով, կեցվածքով վարկաբեկում են հարկային ծառայողի կերպարը և իրենց ցածր կուլտուրայով ստվեր են գցում համակարգի վրաե,- նշել է Ալավերդյանը։