Զապորոժիեի ատոմակայանն ամբողջությամբ հոսանքազրկվել է

Զապորոժիեի ԱԷԿ-ը զրկվել է արտաքին էներգամատակարարից. կայանն ամբողջությամբ հոսանքազրկված է։ Տեղեկությունը հայտնում է ատոմակայանի մամուլի ծառայությունը։

«Զապորոժիեի ԱԷԿ-ն ամբողջությամբ հոսանքազրկված է։ Կայանի կարիքներն ապահովող 330 կՎ լարման «Ֆերոսպլավնայա-1» բարձրավոլտ էլեկտրահաղորդման գիծը ավտոմատ կերպով անջատվել է երեկ երեկոյան», – ասվում է հաղորդագրության մեջ։

Նշվում է, որ արտաքին էլեկտրամատակարարման անջատումից հետո Զապորոժիեի ԱԷԿ-ի էներգաբլոկները անցել են պահեստային դիզելային գեներատորներով սնուցման։

Սարքավորումները բնականոն աշխատել են, անվտանգության համակարգի որևէ խափանում չի հայտնաբերվել։

Կայանի անձնակազմը վերահսկում է սարքավորումների աշխատանքային պարամետրերը։ Անհրաժեշտ միջոցներ են ձեռնարկվում էներգաբլոկների անվտանգ վիճակը պահպանելու համար։

«Զապորոժիեի ատոմակայանի տարածքում և դիտարկման գոտում ճառագայթային ֆոնը նորմայի սահմաններում է և չի գերազանցում սահմանված չափանիշները: Իրավիճակը գտնվում է ատոմակայանի մասնագետների մշտական հսկողության տակ», – ասվում է հաղորդագրության մեջ: