ՄԱԿ-ի գլխավոր քարտուղարը կոչ է արել ապահովել նավագնացության ազատությունը Հորմուզի նեղուցում

ՄԱԿ-ի գլխավոր քարտուղար Անտոնիու Գուտերեշը մտահոգված է Հորմուզի նեղուցում սահմանափակումներով և կոչ է արել լիովին վերականգնել միջազգային նավագնացության իրավունքները և նավագնացության ազատությունը։ Այս մասին հայտարարել է ՄԱԿ-ի գլխավոր քարտուղարի խոսնակ Ստեֆան Դյուժարիկը։

Նա նշել է, որ ռազմավարական ջրային ուղու կարգավիճակի շուրջ «մեծ ակտիվություն» և «մեծ խառնաշփոթ» է եղել՝ հավելելով, որ Գուտերեշը մտահոգված է վերջին 48 ժամվա ընթացքում ծովային միջադեպերով։ Նա ընդգծել է, որ Հորմուզի նեղուցում նավարկության ազատությունը «պետք է հարգվի բոլորի կողմից»։

Դյուժարիկը նաև վերահաստատել է ՄԱԿ-ի դիրքորոշումը, որ «չկա որևէ ռազմական նպատակ, որը կարդարացնի քաղաքացիական ենթակառուցվածքների ամբողջական ոչնչացումը կամ քաղաքացիական բնակչությանը դիտավորյալ ցավ պատճառելը»։

«Աշխարհի պարարտանյութերի մատակարարումների մոտ 10 կամ 10-12 տոկոսը արգելափակված է, այնպես չէ՞։ Մենք տեսել ենք պարարտանյութերի, կարբամիդի գնի աճ», - ասել է Դյուժարիկը՝ հավելելով, որ նավթի գինը նույնպես բարձրացել է։

«Այդ ամենն առաջին հերթին ազդում է ՄԱԿ-ի գործակալությունների, նրանց պլանավորման և գնումների կարողության վրա», - ընդգծել է նա։