Չինաստանի քաղաքացիների համար Ռուսաստան առանց վիզայի մուտքի ռեժիմը շուտով կգործի. Պուտին

ՌԴ նախագահ Վլադիմիր Պուտինը հայտարարել է, որ Ռուսաստանը շուտով կկիրառի հայելային միջոցառումներ՝ Չինաստանի քաղաքացիների համար վիզայի ռեժիմը վերացնելու համար, հաղորդում է «Интерфакс»-ը։

«Մեր չինացի ընկերների՝ Ռուսաստանի քաղաքացիների համար անվիզա ռեժիմ մտցնելու վերաբերյալ որոշումը, անկասկած, կնպաստի մեր ժողովուրդների միջև կապերի հետագա ամրապնդմանը: Մենք շնորհակալ ենք բարի կամքի այս դրսևորման համար: Մեր կողմից հայելային միջոցառումները շատ շուտով ուժի մեջ կմտնեն Չինաստանի Ժողովրդական Հանրապետության քաղաքացիների համար, որոնք այցելում են Ռուսաստան»,- ասել է Պուտինը Չինաստանի Պետական ​​խորհրդի վարչապետ Լի Ցյանի հետ հանդիպման ժամանակ։

Ռուսաստանի նախագահը վստահություն է հայտնել, որ սա շատ լուրջ հետևանքներ կունենա ինչպես տնտեսական, այնպես էլ մարդասիրական ոլորտներում: «Իմ կարծիքով, սա դրական «պայթյուն» կլինի մեր հարաբերությունների զարգացման գործում»,- ասել է Պուտինը։

Չինաստանի արտգործնախարարությունը նախկինում հայտարարել էր, որ Չինաստանը սեպտեմբերի 15-ից սկսած Ռուսաստանի քաղաքացիների համար կներդնի մեկ տարվա, 30-օրյա փորձնական անվիզա ռեժիմ: Այս քաղաքականությունը տարածվում է սովորական անձնագրեր ունեցողների վրա։ Նոր քաղաքականությունը վերաբերում է Ռուսաստանի այն քաղաքացիներին, ովքեր մտադիր են Չինաստան մեկնել զբոսաշրջության և գործարար նպատակներով, ինչպես նաև՝ մասնակցել տարբեր մարդասիրական փոխանակումների, այցելել հարազատներին կամ՝ տարանցիկ նպատակներով։