ՀԱՄԱՍ-ին առնվազն տասը օր է պետք պատանդների մարմինները գտնելու համար

Պաղեստինյան ՀԱՄԱՍ շարժումը հայտարարել է, որ զոհված իսրայելցի պատանդների մարմինները գտնելու համար առնվազն տասը օր կպահանջվի։ Այդ մասին հաղորդում է Wall Street Journal-ը՝ հղում անելով աղբյուրներին։

Ավելի վաղ ԱՄՆ նախագահ Դոնալդ Թրամփը հայտարարել էր Իսրայելի և Համասի միջև համաձայնության մասին՝ խաղաղության ծրագրի առաջին փուլը կյանքի կոչելու համար պաղեստինյան շարժումը կազատի պատանդներին, իսկ Իսրայելը կհեռացնի իր զորքերը։

«ՀԱՄԱՍ-ը հայտարարում է, որ զոհված պատանդների մարմինները գտնելու համար կպահանջվի առնվազն տասը օր»,-ասվում է հայտարարության մեջ։

Թերթի տվյալներով՝ իսրայելցի պաշտոնյաները կարծում են, որ ՀԱՄԱՍ-ը դժվարություններ կունենա մնացած բոլոր պատանդների մարմինները գտնելու հարցում, և որ դա ավելի երկար ժամանակ կպահանջի։

Երկուշաբթի օրվանից Եգիպտոսում ընթանում են ՀԱՄԱՍ-ի և իսրայելական պատվիրակությունների միջև անուղղակի բանակցություններ՝ Եգիպտոսի, Կատարի և Թուրքիայի միջնորդների մասնակցությամբ, Գազայի հատվածում երկամյա պատերազմը դադարեցնելու վերաբերյալ ԱՄՆ նախագահ Դոնալդ Թրամփի առաջարկած խաղաղության ծրագրի շուրջ։