Հայկական երաժշտության հնչյունները՝ Իտալիայում․ կատարվեցին հայ հոգևոր երաժշտության գանձերը

Օգոստոսի 24-ից սեպտեմբերի 7-ը Իտալիայի Ֆանո քաղաքում անցկացվում է 52-րդ «Միջազգային Բազմաձայն Երաժշտության Փառատոնը» («Incontro Internazionale Polifonico Città di Fano»), որն ամեն տարի համախմբում է տարբեր երկրների բարձրակարգ երգչախմբեր ու երաժշտական կոլեկտիվներ։

Սեպտեմբերի 3-4-ին փառատոնի շրջանակում իր բացառիկ համերգային ծրագրով հանդես եկավ Հայաստանի Պետական կամերային երգչախումբը (Coro da Camera Nazionale Armeno), Մաեստրո Ռոբերտ Մլքեյանի ղեկավարությամբ։ Երգչախումբը ներկայացրեց Կոմիտասի ստեղծագործությունները և հայ հոգևոր երաժշտության գանձերը։

Հայկական երաժշտության հնչյունները, որոնցում համադրված էին դարերի ավանդույթն ու հոգևոր խորքը, տպավորիչ արձագանք գտան հանդիսատեսի և մասնակիցների շրջանում։

Իտալիայում ՀՀ դեսպանությունը սերտորեն համագործակցեց փառատոնի կազմակերպիչների հետ և մասնակցեց ներկայացված մշակութային միջոցառումներին՝ ընդգծելով հայ երաժշտության համաշխարհային արժեքը և Հայաստանի ներկայությունը միջազգային հարթակներում։ Երգչախմբին ողջունեց և շնորհակալություն խոսքեր հղեց նաև դեսպան Վ․ Կարապետյանի տիկին Լ․ Նազարյանը՝ բարձր գնահատելով նրանց արվեստն ու փառատոնին բերված հայաստանյան գույները։