Սատանայի գործելաոճն է ըմբոստանալ, հակառակվել այն ամենին, ինչը Աստծուց է. Տեր Հակոբ

Տեր Հակոբ քահանա Իսահակյանի հրապարակումը․

«Հուդան իր նենգ ծրագիրն իրականացնելու համար նոր հուդաներ է փնտրում։

Եթե տարբեր ոլորտներում գտել եք այդպիսիններին, ապա ականջալուր եղեք, որ որևէ եկեղեցական, քահանայական աստիճանին արժանանալուց առաջ, մերժում է բոլոր աղանդավորներին, չարի ծառաներին, մոլորեցնողներին և անվերապահ իր հնազանդությունը հայտնում եկեղեցուն, եկեղեցվո դավանանքին, եպիսկոպոսաց դասին և անշուշտ` Վեհափառ Հայրապետին։

Եկեղեցու Աստվածադիր նվիրապետական կարգի հանդեպ ունեցած հնազանդությունը` եկեղեցու մեջ մնալու հիմնասյունն է, Աստծո հետ միության մեջ գտնվելու առհավատչյան։

Եկեղեցական կարգ ու բարքին անհնազանդ գտնվողները ինքնըստինքյան դուրս են մնում փրկության տապան Մայր եկեղեցուց։

Ուստի քո տեսակը եկեղեցում վաղուց ի վեր մերժվել է, ինչպես մերժվել են բոլոր խառնակիչները, չարի ծառաները, ովքեր միտված են եղել եկեղեցու միաբանությունը խաթարել։

Սատանայի գործելաոճն է ըմբոստանալ, հակառակվել այն ամենին, ինչը Աստծուց է, որի համար կոչվում է հակառակորդ, բանսարկու, կորսուցիչ, մոլորեցնող, և թերևս միայն սա է չարի գոյության հենարանը, որովհետև արդեն իսկ հեռացված և մերժված է լույսի թագավորությունից։ Կարիք չունեք ձեր կամակատարների հետ անմնացորդ հետևելու բելիարին` իմացեք, որ կորսուցիչը դատապարտված է կորստյան։

Սիրելի հայորդինե՜ր, Աստվածուրացը առանց իր նմանների չի կարող գործել, ուստի հեռու մնացեք չարի բոլոր տեսակի խարդավանքներից, եկեղեցու մեջ եղեք, որպեսզի կորսվածների հետ դուք էլ չկորչեք»։