ՀՀ գործող իշխանությունը Արցախն ու Արցախի ժողովրդին վերաբերվում է որպես բեռ ու խոչընդոտ. Բեգլարյան

Արցախի նախկին ՄԻՊ և նախկին պետնախարար Արտակ Բեգլարյանը գրել է.

«Փախստականների համաշխարհային օրը արձանագրենք, որ Արցախի ժողովուրդը փախստական է դարձել իր դեմ իրականացված ցեղասպանական քաղաքականության հետևանքով:

Իսկ հիմա մեր մայր հայրենիքում արցախցիների հիմնական մասը ծանրագույն վիճակում է, մի զգալի մասն էլ ստիպված արտագաղթել է: Ալիևյան ցեղասպանական ռեժիմն էլ ակտիվորեն ոչնչացնում է մեր մշակութային ժառանգությունն ու բնակավայրերը:

Այս պայմաններում, մեր բոլոր հիմնախնդիրների հիմնարար լուծումը հայրենի Արցախ մեր ժողովրդի հավաքական վերադարձն է, ինչպես միջազգային իրավունքն է ենթադրում: Իսկ նախքան այդ՝ մենք պետք է Հայաստանում ունենանք արժանապատիվ ու կայուն կեցության պայմաններ՝ միաժամանակ ներդրում ունենալով Մայր Հայաստանի զարգացման ու զորացման գործում:

Ցավոք, այսքանը չի գիտակցում ու կարևորում գլխավոր սուբյեկտը՝ ՀՀ գործող իշխանությունը, որը, հակառակը, Արցախն ու Արցախի ժողովրդին վերաբերվում է որպես բեռ ու խոչընդոտ:

Վստահ եմ, որ սա այսպես չի մնա, պարզապես պետք է շարունակել հետևողական կերպով պայքարել հանուն մեր հավաքական իրավունքների»: