Այս իշխանությունները թաղում են անհետ կորածների հարցը․ անհետ կորածի հարազատ

Երեկվանից անհետ կորածների հարազատները փակ պահում են Բաղրամյան պողոտան՝ պահանջելով հստակություն և պատասխանատու մոտեցում իրենց հարազատների ճակատագրի հարցում։ Նրանք մտահոգված են, որ Ազգային անվտանգության ծառայության տնօրենի փոփոխությունը կարող է խաթարել մինչ այդ ընթացող հումանիտար բանակցությունները։

Տաթև Սողոյանը, ում եղբայրը անհետ կորածներից է, ընդգծում է, որ իրենց պահանջը առաջին հերթին վստահություն ստանալն է նոր նշանակված պաշտոնյաներից.

«Մտահոգությունը մեկն է՝ հումանիտար բանակցությունները կարող են փակուղի մտնել երեկվա իրադարձությունների հետևանքով», – նշում է նա։

«Մենք դեռևս նման հավաստիացում չենք ստացել։ Չգիտենք՝ ով է շարունակելու գործընթացը, և արդյոք նույն կետից ու նույն ինտենսիվությամբ», – ավելացնում է նա։

Նա նաև հիշեցնում է, որ նախկինում ԱԱԾ նախկին տնօրեն Արմեն Աբազյանի շնորհիվ դրական ազդակներ էին ստացվում, և նման կտրուկ փոփոխությունները՝ առանց շփման ու երաշխիքների, խորացնում են իրենց անվստահությունը։

«Մենք դրա դառը փորձը տեսել ենք՝ ամեն նոր մարդ ամեն ինչ սկսում է իր կետից», – ասում է Տաթևը։

Ներկայում պահանջում են հանդիպում նորանշանակ պաշտոնյայի հետ՝ հստակ հավաստիացում ստանալու համար։

Մանրամասն՝ տեսանյութում։