Թրամփը Նեթանյահուին հայտնել է, որ դեմ է Իրանի նկատմամբ ռազմական գործողություններին

ԱՄՆ նախագահ Դոնալդ Թրամփը հունիսի 9-ին կայացած  հեռախոսազրույցի ժամանակ Իսրայելի վարչապետ Բենիամին Նեթանյահուին ասել է, որ դեմ է Իրանի նկատմամբ ռազմական գործողություններին, քանի որ ակնկալում է Թեհրանի հետ համաձայնության գալ միջուկային ծրագրի շուրջ:  Այս մասին հաղորդում է Axios լրատվական հարթակը։

Թրամփը Նեթանյահուի հետ զրույցում վստահություն է հայտնել, որ Իրանի հետ համաձայնության հասնելու հնարավորություն կա: Նախագահը նշել է, որ այդ պատճառով էլ այս պահին դեմ է հանդես գալիս ռազմական գործողություններին:

ԱՄՆ նախագահն ընդգծել է, որ իրանցիներն այս հարցում համառություն են դրսևորում, սակայն ինքը կարծում է, որ նրանց կարելի է համոզել համաձայնագիր կնքել։ Թրամփը նշել է, որ ցանկանում է սպասել բանակցությունների հաջորդ փուլի արդյունքներին:

Հիշեցնենք՝ ԱՄՆ-Իրան բանակցությունների հաջորդ՝ վեցերորդ փուլը նախատեսված է հունիսի 15-ին, Օմանի մայրաքաղաքում։ Ամերիկյան պատվիրակությունը գլխավորում է Սպիտակ տան հատուկ բանագնաց Սթիվ Ուիթքոֆը, իսկ իրանական պատվիրակությունը՝ արտգործնախարար Աբբաս Արաղչին։