Խմբային հարված է հասցվել Ուկրաինայի ռազմարդյունաբերական համալիրի օբյեկտներին. ՌԴ ՊՆ

Գիշերը ռուսական զորքը խմբային հարված է հասցրել Ուկրաինայի ռազմարդյունաբերական համալիրի և Ուկրաինայի զինված ուժերի օբյեկտներին։ Այս մասին հայտնել է ՌԴ ՊՆ–ն։

«Գիշերը ՌԴ ԶՈւ–ն բարձր ճշգրտության զենքով և հարվածային անօդաչուներով խմբային հարված է հասցրել Կիևում ուկրաինական ավիացիոն, հրթիռային, զրահատեխնիկական և նավաշինական արդյունաբերության ձեռնարկություններին, Ուկրաինայի զինված ուժերի կառավարման կետերին և տեղակայման վայրերին, ուկրաինական ստորաբաժանումների զենքի և ռազմական տեխնիկայի կենտրոնացման վայրերին, ինչպես նաև ռազմական օդանավակայանների, զինամթերքի և վառելիքի պահեստների ենթակառուցվածքներին։ Հարվածները հասել են իրենց նպատակակետին։ Նշանակված բոլոր օբյեկտները խոցվել են»,– ասվում է ռազմական գերատեսչության հայտարարության մեջ։

Հիշեցնենք՝ 2022 թվականի փետրվարի 24-ին սկսվեց Ռուսաստանի և Ուկրաինայի միջև զինված հակամարտություն՝ Ռուսաստանի զինված ուժերի կողմից Ուկրաինայի տարածք ներխուժմամբ։ Մոսկվայի ժամանակով մոտավորապես ժամը 05:30-ին Ռուսաստանի նախագահ Վլադիմիր Պուտինը հայտարարեց Ուկրաինայի «ապառազմականացման և դենացիֆիկացման հատուկ գործողության» մասին, որից րոպեներ անց հրթիռային հարվածներ սկսվեցին Ուկրաինայի տարբեր վայրերում։ Մարտական գործողություններն ընթանում են մինչ օրս։