Իսրայելի բանակը հարվածներ է հասցրել Սիրիայի հարավին

Իսրայելի բանակը հայտարարել է, որ հարված է հասցրել Սիրիայի հարավում՝ Մազրաաթ Բեյթ Ջին շրջանում, պաղեստինյան ՀԱՄԱՍ խմբավորման անդամի ուղղությամբ, մի քանի օր անց այն բանից հետո, երբ Իսրայելը գրեթե մեկ ամսվա մեջ առաջին անգամ օդային հարվածներ էր հասցրել այդ երկրին, հայտնում է Times of Israel-ը։

ՀԱՄԱՍ-ը դեռևս չի մեկնաբանել հարձակումը։

Երեքշաբթի Իսրայելը հայտարարել է, որ հարված է հասցրել կառավարությանը պատկանող զենքի ուղղությամբ՝ ի պատասխան այն բանի, որ երկիրը նոր ղեկավարության օրոք առաջին անգամ երկու արկ է արձակել, իսկ պաշտպանության նախարար Իսրայել Կացը դրա համար պատասխանատվությունը դրել է Սիրիայի նախագահ Ահմեդ աշ-Շարաայի վրա։

Ըստ Al Jazeera-ի, ի պատասխան Դամասկոսը հայտարարել է, որ գնդակոծության մասին հաղորդագրությունները ստուգված չեն, և հաստատել է, որ Սիրիան սպառնալիք չի ներկայացնում որևէ տարածաշրջանային կողմի համար։

Ըստ որոշ տվյալների, գնդակոծության պատասխանատվությունն ստանձնել է «Նահատակ Մուհամմադ Դեյֆի բրիգադներ» քիչ հայտնի խմբավորումը, ինչը ակնհայտ հղում է ՀԱՄԱՍ-ի ռազմական առաջնորդին, որը սպանվել էր 2024 թվականին իսրայելական հարձակման հետևանքով։

Իսրայելն ու Սիրիան վերջերս ուղիղ բանակցություններ են սկսել՝ լարվածությունը թուլացնելու համար։