ՀԱՄԱՍ-ն ազատ է արձակել ութ պատանդի, Իսրայելն էլ ազատել է 110 պաղեստինցու

Պաղեստինյան ՀԱՄԱՍ խմբավորումն ազատել է ևս ութ պատանդի՝ Կարմիր Խաչին հանձնելով երեք իսրայելցի և հինգ Թաիլանդի քաղաքացու։ Իսրայելն էլ իր հերթին ազատ է արձակել 110 պաղեստինցի բանտարկյալի, հայտնում է BBC-ն։

110 պաղեստինցի բանտարկյալից 32-ը դատապարտվել է ցմահ ազատազրկման, իսկ 48-ը երկարաժամկետ կալանքի։ Կան նաև երկու 15 տարեկան դեռահաս, ևս 30 հոգի մինչև 18 տարեկան։ Ազատ արձակվածներից 21-ը պետք է արտաքսվի։

Թաիլանդի արտաքին գործերի նախարարության տվյալներով՝ 2023 թվականի հոկտեմբերի 7-ին Իսրայելի վրա ՀԱՄԱՍ-ի հարձակման ժամանակ առևանգվել է Թաիլանդի 31 քաղաքացի, որոնց մեծ մասն ազատ է արձակվել մինչև տարեվերջ։ Ընդհանուր առմամբ Իսրայելում ապրում է Թաիլանդի մոտ 30 հազար քաղաքացի։

Ավելի վաղ ՀԱՄԱՍ-ը ազատ է արձակել յոթ պատանդի, իսկ Իսրայելը ազատ է արձակել 290 բանտարկյալի։

Չորրորդ փոխանակումը նախատեսված է շաբաթվա վերջին, սակայն ՀԱՄԱՍ-ը չորեքշաբթի մեղադրեց Իսրայելին գործարքը վտանգի ենթարկելու մեջ՝ դադարեցնելով վառելիքի, վրանների, ծանր տեխնիկայի և այլ սարքավորումների մատակարարումները: