Վրաստանի խորհրդարանը նոյեմբերի 28-ին կհաստատի նոր կառավարության կազմը

Վրաստանի խորհրդարանը նոյեմբերի 28-ին անցկացվելիք լիագումար նիստում կհաստատի կառավարության նոր կազմը՝ վարչապետ Իրակլի Կոբախիձեի գլխավորությամբ, հայտարարել է օրենսդիր մարմնի խոսնակ Շալվա Պապուաշվիլին, գրում է Новости-Грузия-ն։

Կառավարության կազմը կհաստատեն միայն «Վրացական երազանք»-ի պատգամավորները:

Ընդդիմությունը հրաժարվում է ճանաչել խորհրդարանական ընտրությունների արդյունքները և չի մասնակցում օրենսդիր մարմնի աշխատանքներին։

Կոբախիձեն նախօրեին հայտարարել է կառավարությունում երեք նախարարների փոխարինման մասին։ Գյուղատնտեսության նախարար Օթար Շամուգիան և արդարադատության նախարար Ռատի Բրեգաձեն հրաժարական են տվել։ Առանցքային է դարձել արտգործնախարար Իլյա Դարչիաշվիլիի փոխարինումը Եվրոպայի հետ հարաբերությունների խորհրդարանական հանձնաժողովի ղեկավար Մակա Բոչորիշվիլիով։ Նա ստիպված կլինի արտաքին քաղաքականություն վարել ԵՄ-ի և ԱՄՆ-ի հետ Թբիլիսիի խզված հարաբերությունների և Արևմուտքի շարունակական հարցերի ֆոնին՝ հոկտեմբերի 26-ին անցկացված խորհրդարանական ընտրությունների արդյունքներով։