Բայրամովը մեկնել է Նյու Յորք. Նյու Յորքում է նաև Նիկոլ Փաշինյանը

Ադրբեջանի արտաքին գործերի նախարար Ջեյհուն Բայրամովն աշխատանքային այցով մեկնել է Նյու Յորք՝ մասնակցելու ՄԱԿ-ի Գլխավոր վեհաժողովի 79-րդ նստաշրջանին, հայտնում է երկրի ԱԳՆ-ն։

Այցի շրջանակում Բայրամովը ելույթ կունենա Գլխավոր վեհաժողովում, կմասնակցի մի շարք այլ միջազգային միջոցառումների: Նախատեսվում են նաև երկկողմ հանդիպումներ օտարերկրյա պետությունների պաշտոնական ներկայացուցիչների և միջազգային կազմակերպությունների ղեկավարների հետ։

Նշենք, որ Նիկոլ Փաշինյանը տիկնոջ՝ Աննա Հակոբյանի հետ սեպտեմբերի 22-27-ն աշխատանքային այցով մեկնել է Ամերիկայի Միացյալ Նահանգներ: Հայտնում են կառավարության մամուլի ծառայությունից:

Հանրապետության վարչապետը Նյու Յորքում կմասնակցի ՄԱԿ-ի Գլխավոր ասամբլեայի 79-րդ նստաշրջանի աշխատանքներին, ելույթներ կունենա Ապագայի գագաթնաժողովում, ՄԱԿ ԳԱ 79-րդ նստաշրջանի բարձրաստիճան հատվածում: 

Այցի ընթացքում վարչապետ Փաշինյանը հանդիպում կունենա ՄԱԿ-ի գլխավոր քարտուղար Անտոնիո Գուտերեշի հետ, նախատեսված են երկկողմ մի շարք հանդիպումներ տարբեր երկրների գործընկերների հետ: