Պուտինը սեպտեմբերի 3-ին կայցելի Մոնղոլիա, որը Հռոմի ստատուտը ստորագրած երկիր է

Վլադիմիր Պուտինը սեպտեմբերի 3-ին կմեկնի Մոնղոլիա, որտեղ կմասնակցի հիշատակի միջոցառումներին և բանակցություններ կվարի: Այս մասին հայտնել Է Կրեմլի մամուլի ծառայությունը, փոխանցում է ՌԻԱ Նովոստին։

Ռուսաստանի ղեկավարը երկիր կայցելի Մոնղոլիայի նախագահի հրավերով։

Երկու ղեկավարները կքննարկեն ռուս-մոնղոլական հարաբերությունների զարգացման հեռանկարները և մտքեր կփոխանակեն արդի միջազգային և տարածաշրջանային խնդիրների շուրջ։

Ինչպես նշում է BBC-ի ռուսական ծառայությունը, սա կլինի Պուտինի առաջին այցը երկիր, որը ստորագրել է Միջազգային քրեական դատարանի Հռոմի ստատուտը։

2023 թվականի մարտին Միջազգային քրեական դատարանը Վլադիմիր Պուտինին ձերբակալելու օրդեր է տվել և Հռոմի ստատուտը ստորագրած երկրները ֆորմալ առումով պետք է կատարեն օրդերը։