Սիդորովը կարծում է, որ ՀԱՊԿ երկրների ղեկավարները միջոցներ կձեռնարկեն Կովկասում իրադրության կայունացման համար

Հավաքական անվտանգության պայմանագրի կազմակերպության միացյալ շտաբի պետ Անատոլի Սիդորովը կարծիք է հայտնել, որ  կազմակերպության անդամ երկրների ղեկավարները կձեռնարկեն բոլոր անհրաժեշտ միջոցները Կովկասի տարածաշրջանում իրադրության կայունացման համար։

Ինչպես հաղորդում է ՏԱՍՍ գործակալությունը, Սիդորովն այդ մասին ասել է նոյեմբերի 16-ին կայացած ճեպազրույցի ժամանակ։ 

«Ես չեմ կարող դատել, թե ինչ որոշում կկայացնեն պետությունների ղեկավարները: Կարծում եմ, որ նրանք կձեռնարկեն բոլոր միջոցները կայունացնելու իրադրությունը կովկասյան հողում՝ նաև Հայաստանում, և հարակից  պետություններում», - նշել է Սիդորովը։

Նա հավելել է, որ միջոցառումներն առաջարկվել են դեռևս 2022 թվականին՝ ՀԱՊԿ միացյալ շտաբի և քարտուղարության պատվիրակության՝ Հայաստանում կատարած աշխատանքի արդյունքների հիման վրա: