կարևոր
2734 դիտում, 10 ամիս առաջ - 2023-05-11 10:45
Քաղաքական

Բլինքենն ու Միշելը քննարկել են Հայաստանի ու Ադրբեջանի միջև կայուն և տևական խաղաղությանն աջակցելու հնարավորությունները

Բլինքենն ու Միշելը քննարկել են Հայաստանի ու Ադրբեջանի միջև կայուն և տևական խաղաղությանն աջակցելու հնարավորությունները

ԱՄՆ պետքարտուղար Էնթոնի Բլինքենը և Եվրոպական խորհրդի նախագահ Շառլ Միշելը հեռախոսազրույց են ունեցել, որի ընթացքում քննարկել են Հայաստանի և Ադրբեջանի միջև կայուն և տևական խաղաղությանն աջակցելու հնարավորությունները։ Ինչպես հայտնում է «Արմենպրես»-ը, այս մասին հաղորդագրություն է տարածել ԱՄՆ պետդեպը։

Հայաստանի և Ադրբեջանի արտաքին գործերի նախարարներ Արարատ Միրզոյանն ու Ջեյհուն Բայրամովը մայիսի 1-4-ը բանակցություններ են անցկացրել Վաշինգտոնում։ Բանակցությունների առաջին և վերջին նիստերին մասնակցել է նաև ԱՄՆ պետքարտուղար Էնթոնի Բլինքենը։ Վաշինգտոնի քննարկումներից հետո ԵՄ-ն հայտնեց, որ մայիսի 14-ին Բրյուսելում կկայանա Հայաստանի և Ադրբեջանի ղեկավարների, Եվրոպական խորհրդի նախագահ Շառլ Միշելի եռակողմ հանդիպումը։

Հիշեցնենք, որ Ադրբեջանը մայիսի 11-ի առավոտից կրակ էր բացել Սոթքի հատվածում տեղակայված հայկական դիրքերի ուղղությամբ։ Հայկական կողմը հայտնել է 4 վիրավորի մասին։ Հայ-ադրբեջանական սահմանի այդ հատվածում իրավիճակը մի քանի ժամ լարված էր, սակայն ՀՀ պաշտպանության նախարարությունը քիչ առաջ հայտնեց, որ լարվածությունն էականորեն նվազել է։