ԵՄ-ն կես տարով երկարացրել է 1500 ռուսաստանցիների եւ 205 իրավաբանական անձանց դեմ բոլոր պատժամիջոցները

Եվրամիությունը հերթական անգամ կես տարով երկարացրել է հակառուսական պատժամիջոցների ամբողջ բլոկը, որոնք վերաբերում են 1500 ֆիզիկական եւ 205 իրավաբանական անձանց, եւ սահմանվել են Ուկրաինայի տարածքային ամբողջականությունը իբր խաթարելու համար։ Այս մասին ասվում է ԵՄ խորհրդի երկուշաբթի օրը հրապարակված հայտարարության մեջ։

«ԵՄ խորհուրդը կես տարով երկարացրել է սահմանափակող միջոցների ցանկի գործունեությունը ռուսաստանցի գրեթե 1500 ֆիզիկական եւ 205 իրավաբանական անձանց նկատմամբ»,- ասվում է փաստաթղթում։ Որոշումն ընդունվել է առանց քննարկման։ Ռուսաստանի համար «սեւ ցուցակը» Եվրամիությունը սկսել է 2014 թվականի մարտին կազմել՝ կես տարին մեկ երկարացնելով այն վեց ամսով։ Այս ցուցակում ընդգրկված բոլոր անձանց արգելվում է մուտք գործել համայնքի տարածք, նրանց ֆինանսական ակտիվները ԵՄ-ում ենթակա են սառեցման, իսկ եվրոպական բիզնեսներին արգելվում է նրանց հետ որեւէ կապ պահպանել։