Փաստաբանների ծեծի միջադեպին մասնակից երկու ոստիկաններն ազատվել են պաշտոններից

Փաստաբանների ծեծի միջադեպին մասնակցած Էրեբունու բաժնի քրեական հետախուզության բաժանմունքի օպերլիազորներ Մարտուն Եղիազարյանը և Վահե Պապոյանը ազատվել են զբաղեցրած պաշտոններից: Այս մասին Facebook-ի իր էջում գրել է փաստաբան, «Զարթոնք» կուսակցության ղեկավար Արա Զոհրաբյանը:

Նա նաեւ նշել է. «Ուրախ եմ, որ Ներքին գործերի նախարարությունը կառուցողական և արդար կեցվածք է դրսևորել:

Փաստաբանը պետք է պաշտպանված լինի ցանկացած միջավայրում, առավել ևս ոստիկանության բաժիններում:

Փաստաբաններով ուշադրության կենտրոնում ենք պահելու այս խնդրով հերթական զարգացումները, այդ թվում՝ քրեական գործի ընթացքը»:

Հիշեցնենք, որ փետրվարի 8-ին ոստիկանության Էրեբունիի բաժնում իրենց մասնագիտական գործունեության իրականացման ժամանակ ոստիկանները երկու փաստաբանի են ծեծի ենթարկել։