Էրդողանը Փայլանին անվանել է «դավաճան»՝ Հայոց ցեղասպանության ճանաչման մասին օրինագծի պատճառով

Թուրքիայի նախագահ Ռեջեփ Թայիփ Էրդողանը երկուշաբթի հայտարարել է, որ երկրի խորհրդարանում տեղ չկա քրդամետ կուսակցության պատգամավորի համար, որն օրինագիծ է ներկայացրել Թուրքիայի կողմից Օսմանյան կայսրությունում 1915 թվականին Հայոց ցեղասպանությունը ճանաչելու մասին։

«Մենք ընկալում ենք դա որպես բացահայտ դավաճանություն ամենաբարձր ատյանում», - ասել է Էրդողանը կառավարության նիստից հետո ժողովրդին ուղղված հեռուստաուղերձում։

Նա հույս է հայտնել, որ «անհրաժեշտ միջոցներ» կձեռնարկվեն Կարո Փայլանի նկատմամբ, «որը խախտել է խորհրդարանի օրենքի ու բարոյականության նորմերը»։

Երկուշաբթի Անկարայի դատախազությունը հետաքննություն է սկսել ընդդիմադիր քեմալական Հանրապետական-ժողովրդական կուսակցության պատգամավոր Մուստաֆա Սեզգինի նկատմամբ Հայոց ցեղասպանության մասին թվիթերյան գրառման համար։ Հետաքննությունն իրականացվում է տխրահռչակ 301 հոդվածով («Թուրքական պետությանը հրապարակայնորեն վիրավորելը»), որը պատժվում է ազատազրկմամբ՝ առավելագույնը երեք տարի ժամկետով։