Պենտագոնը մտահոգված է, որ Պուտինը «լիովին տեղեկացված չէ, թե ինչքան վատ են ընթանում գործերը»

ԱՄՆ ռազմական գերատեսչությունը համաձայն է Սպիտակ տան այն գնահատականին, որ Ռուսաստանի նախագահ Վլադիմիր Պուտինը վատ է տեղեկացված Ուկրաինայում տեղի ունեցող իրադարձությունների մասին. ըստ BBC-ի ռուսական ծառայության՝ ասել է Պենտագոնի խոսնակ Ջոն Քիրբին։ 

Ավելի վաղ Սպիտակ տան հաղորդակցության գծով տնօրեն Քեյթ Բեդինգֆիլդը հայտարարել էր, որ, ըստ հետախուզության, Պուտինի շրջապատը վախենում է նրան ասել ճշմարտությունը և ապատեղեկացնում է նախագահին ռազմական գործողությունների ընթացքի ու պատժամիջոցների հետևանքով պատճառված տնտեսական վնասի մասին։

Ըստ Քիրբիի՝ Պենտագոնը մտահոգված է այս գնահատականով։ «Սա նրա բանակն է։ Սա նրա պատերազմն է։ Նա է դա ընտրել... Այն փաստը, որ նա կարող է լիովին չհասկանալ, թե որքանով են ձախողվում իր զորքերը Ուկրաինայում, որոշ մտահոգություններ է առաջացնում»,- ասել է նա:

Պենտագոնի խոսնակի խոսքով՝ Պուտինի անտեղյակությունը կարող է հանգեցնել հակամարտությունը դադարեցնելու բանակցություններում ոչ այնքան ճիշտ որոշումների։ «Եթե նա ամբողջությամբ ճիշտ տեղեկացված չէ, թե ինչ վատ են գործերը, ապա ինչպե՞ս են նրա բանագնացները պատրաստվում համաձայնության գալ»,- հավելել է նա: