Այս իշխանությունները սեփական երկրի սուվերենությունն են ուղղակի մոռացության տվել. Գեղամ Մանուկյան

«Հայաստան» խմբակցության պատգամավոր Գեղամ Մանուկյանը Ազգային ժողովում լրագրողների հետ ճեպազրույցում ներկայացրեց խմբակցության պատգամավորների Արցախ այցից մանրամասներ: Նրա խոսքով՝ հանդիպել են բնակիչներին, զրուցել հետները, իրավիճակը տեղում հասկացել, քննարկումներ են ունեցել պաշտոնյաների, Արցախի ԱԺ բոլոր խմբակցությունների պատգամավորների հետ:

«Անհանգիստ մթնոլորտ էր՝ հաշվի առնելով ՀՀ արտաքին գործերի նախարարի աղմկահարույց հայտարարությունները, ՔՊ պատգամավոր Էդուարդ Աղաջանյանի վտանգավոր ելույթները: Առհասարակ, իշխանական պատգամավորների՝ իրար հաջորդող հայտարարությունները չեն կարող չազդել մեր հայրենակիցների վրա»,- ասաց նա:

Պատգամավորը նաև տեղեկացրեց, որ մարտի 21-ին լինելու են խորհրդարանական լսումներ, որին մասնակցելու են Արցախի բոլոր խորհրդարանական ուժերի ներկայացուցիչները: