Թուրքերի ավելի քան 50 տոկոսը չի վստահում պետական հաստատություններին

Թուրքերի ավելի քան 50 տոկոսը չի վստահում պետական հաստատություններին, ինչպիսիք են Կրոնական հարցերի վարչությունը (Diyanet), Թուրքիայի վիճակագրական ինստիտուտը (TÜİK) եւ Կենտրոնական բանկը, ասվում է Aksoy Research-ի ուսումնասիրության մեջ:

Սոցիոլոգիական հետազոտությունը ցույց է տվել, որ պետական բոլոր մարմիններից TÜİK-ն ամենաքիչ վստահությունն է առաջացնում՝ մասնակիցների 57,5%-ը նշել են, որ իրենք քիչ են վստահում կամ ընդհանրապես չեն վստահում գերատեսչությանը, հաղորդում է TELE1-ը։

Diyanet-ի նկատմամբ վստահությունը նույնպես ցածր է եղել՝ 53,4 տոկոսը նշել է, որ քիչ կամ ընդհանրապես չի վստահում նրան, մինչդեռ Կենտրոնական բանկի նկատմամբ անվստահության մակարդակը կազմել է 56,7 տոկոս:

Իշխող «Արդարություն եւ զարգացում» կուսակցության (ԱԶԿ) ընտրողները ցուցաբերել են հաստատությունների նկատմամբ վստահության ամենաբարձր մակարդակը: ԱԶԿ-ի ընտրողները 42 տոկոսով վստահում են TÜİK-ին, մինչդեռ Կենտրոնական բանկի եւ Diyanet-ի հանդեպ վստահությունը համապատասխանաբար կազմում է 49,3 եւ 55,8 տոկոս: