Թուրքիան չի բախվի Ռուսաստանի հետ Ուկրաինայի հետ ենթադրյալ պատերազմի դեպքում. Bloomberg

Թուրք բարձրաստիճան պաշտոնյայի խոսքերով` ՆԱՏՕ-ի անդամ Թուրքիան շահագրգռված չէ դիմակայել Ռուսաստանին, եթե նա ներխուժի Ուկրաինա, թեև Անկարան Կիևին հարձակողական անօդաչու թռչող սարքեր է վաճառում:

«Թուրքիան չի համակարգում քայլերը Վաշինգտոնի հետ Ուկրաինայի հարցում և գործում է ինքնուրույն՝ պաշտպանելու համար իր շահերը»,- ասել է երկրի արտաքին քաղաքականությանը ծանոթ պաշտոնյան։

Ռուսաստանին ռազմական դիմադրություն ցույց տալու՝ Թուրքիայի դժկամությունը, որը ՆԱՏՕ-ում ԱՄՆ-ից հետո երկրորդ ամենամեծ բանակն ունի, համատեղելի է նախագահ Էրդողանի արտաքին քաղաքական մանևրների հետ: Պաշտոնյան ասել է, որ Էրդողանը ցանկանում է պահպանել Թուրքիայի շահերը՝ Սիրիայից մինչև Լիբիա և Կովկաս, հակամարտություններ, որոնցում Մոսկվան գտնվում է Թուրքիայի հակառակ կողմում։ Իսկ Ուկրաինայի հետ պաշտպանական-արդյունաբերական հարաբերությունների զարգացումը Թուրքիային օգտակար լծակներ է տալիս տարածաշրջանում Ռուսաստանի գործողություններին հակադրվելիս։

Այս շաբաթվա սկզբին Էրդողանը հայտարարել էր, որ Թուրքիան պատրաստ է միջնորդ լինել Ուկրաինայի և Ռուսաստանի միջև՝ կանխելու համար լարվածության աճը: