Bloomberg-ը նշել է Ուկրաինա՝ Ռուսաստանի ներխուժման ամսաթիվը

Ամերիկյան Bloomberg լրատվական գործակալությունը Ուկրաինա Ռուսաստանի ներխուժման հավանական օր է նշել փետրվարի 15-ը։

Bloomberg-ը, վկայակոչելով ԱՄՆ որոշ պաշտոնյաների, հայտնել է, թե ներխուժումը կարող է սկսվել Դոնբասում «կեղծ դրոշի ներքո» գործողությամբ կամ Կիևի վրա հարձակմամբ:

Միևնույն ժամանակ, ԱՄՆ ազգային անվտանգության հարցերով խորհրդական Ջեյք Սալիվանն ասել է, որ Ռուսաստանը կարող է հարձակողական ռազմական գործողություններ ձեռնարկել կամ փորձել հակամարտություն հրահրել Ուկրաինայի ներսում արդեն հաջորդ շաբաթ՝ Պեկինի ձմեռային օլիմպիական խաղերի ավարտից առաջ։

ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել է ԱՄՆ պաշտոնյաների հայտարարությունները, թե Ռուսաստանը շուտով ներխուժելու է Ուկրաինա։ Զախարովայի խոսքերը մեջբերում է ՏԱՍՍ-ը։

«Սպիտակ տան հիստերիան ավելի բացահայտ է, քան երբևէ։ Անգլո-սաքսոններին պատերազմ է պետք` ցանկացած գնով: Սադրանքները, ապատեղեկատվությունն ու սպառնալիքները սեփական խնդիրները լուծելու սիրելի մեթոդ են»,- ասել է ՌԴ ԱԳՆ ներկայացուցիչը։