Իսրայելը և ԱՄՆ-ը կիսում են Սիրիայում Իրանի վրա հարձակման պատասխանատվությունը

Իսրայելը և Միացյալ Նահանգները կիսում են Սիրիայում իրանամետ ուժերի թիրախներին հարվածելու պատասխանատվությունը․ հայտնում է JNS-ը՝ վկայակոչելով իսրայելական ALMA հետազոտական կենտրոնի զեկույցը։

Ըստ զեկույցի՝ Սիրիայում հարձակումները կարելի է դասակարգել ըստ տարածքների։ «Խաղաղ»՝ նույնն է թե՝ «ամերիկյան», գտնվում է երկրի արևելքում: Այն ներառում է Ալ Բուկամալը, Ալ Մայադինը և Դեյր էզ Զորը։

«Այս հատվածում հարձակումները կոչված են խաթարելու Իրանի հետ կապված ուժերի համախմբումը ցամաքային միջանցքի երկայնքով»,- ասվում է փաստաթղթում։

«Աղմկոտ» հատվածը, որը կոչվում է «իսրայելական», գտնվում է երկրի կենտրոնական, հյուսիսային և արևմտյան հատվածներում։ Խոսքը Դամասկոսի, Պալմիրայի, Հոմսի, Լաթաքիայի ու Տարտուսի մասին է։ Հստակեցվում է, որ այս հատվածում հարձակումների համար պատասխանատու է Իսրայելը։

«Այս տարածքում հարձակումների հիմնական նպատակն է հարվածել զենքի պահեստներին և կանխել զենքի փոխանցումը «Հըզբոլլահ»-ին»,- ասվում է զեկույցում: