Մանդարիններից հետո Ռուսաստանն արգելել է նաև կիտրոնի ներկրումը Թուրքիայից

«Ռոսպոտրեբնադզորը» դադարեցնում է թուրքական կիտրոնի ներկրումը Ռուսաստան, որը թունաքիմիկատներ է պարունակում։ Այս մասին հայտնում է ՌԴ գերատեսչության պաշտոնական կայքը։

Սպառողների իրավունքների պաշտպանության և մարդու բարեկեցության վերահսկողության դաշնային ծառայությունը տեղեկացնում է Թուրքիայից թարմ կիտրոնների մեջ թունաքիմիկատների, խլորպիրիֆոսի հայտնաբերման մասին, որը գերազանցում է թույլատրելիության սահմանը:

Ռուսաստանի Դաշնության բնակչության շրջանում թունավորումներից խուսափելու համար նոյեմբերի 3-ից դադարեցվում է ցիտրուսային մրգերի ներմուծումը։ Գերատեսչության մամուլի ծառայությունը նաև ընդգծել է, որ այդ ապրանքները ենթակա են շրջանառությունից հանման։

Հիշեցնենք, որ հոկտեմբերի 29-ին ՌԴ-ն արգելել է նաև թուրքական մանդարինների ներմուծումը: