Ռուսաստանի ԱԳՆ-ն անդրադարձել է Թրամփի նախկին խոսնակի՝ Պուտինի գեղեցիկ թարգմանչուհու մասին մեղադրանքներին

ԱՄՆ նախագահի մամուլի նախկին քարտուղար Ստեֆանի Գրիշամն իր հուշերում գրել է, որ Ռուսաստանի նախագահ Վլադիմիր Պուտինը դիտավորյալ Սպիտակ տան ղեկավար Դոնալդ Թրամփի հետ հանդիպման է մեկնել գեղեցկուհի թարգմանչուհու ուղեկցությամբ՝ բանակցություններին Թրամփի ուշադրությունը շեղելու համար: Բանակցությունները տեղի են ունեցել 2019 թվականին Ճապոնիայում:

Առաջինը, ով մեկնաբանել է ԱՄՆ նախկին նախագահի մամուլի քարտուղարի սկանդալային հայտարարությունը, նրա ռուս գործընկերն էր: «Ռուսաստանի նախագահի հետ բանակցություններում թարգմանիչների ընտրությունը կատարում է Ռուսաստանի ԱԳՆ-ն, պետության ղեկավարն ինքը ներգրավված չէ այս գործընթացում»,- Պուտինի թարգմանչի շուրջ սկանդալին հակիրճ պատասխանել է նրա մամուլի քարտուղար Դմիտրի Պեսկովը:

Իր հերթին, ՌԴ ԱԳՆ-ն մեկնաբանել է ամերիկացի նախկին պաշտոնյայի բացահայտումները: «Այժմ մենք գիտենք, թե ինչ են մտածում ամերիկյան պատվիրակությունների բարձրաստիճան անդամները ռուսների հետ բանակցություններում: Դա կարելի է հասկանալ՝ հաշվի առնելով Միացյալ Նահանգներում ֆեմինիզմի և գենդերի  տասնամյակների փորձը»,- ասել է աղբյուրը: