Բաքվում հայ բանտարկյալների դատապարտումը խախտում է Ժնևի 3-րդ կոնվենցիան. Human Rights Watch

Human Rights Watch միջազգային իրավապաշտպան կազմակերպության Եվրոպայի և Կենտրոնական Ասիայի բաժնի տնօրեն Գիորգի Գոգիան մեկնաբանել է երեկ  Բաքվի դատարանում երեկ հայ ռազմագերիների նկատմամբ կայացված անօրինական վճիռը: Նա նշել է, որ Ադրբեջանի կողմից հայ գերիների քրեական հետապնդումը՝ սահմանի ապօրինի հատման մեղադրանքով, Ժնևի 3-րդ կոնվենցիայի խախտում է:

«Գերված զինծառայողները պետք է գերու կարգավիճակ ստանան. նրանք պետք է վերադարձվեն ռազմական գործողությունների ավարտից հետո»,- գրել է Գոգիան Twitter-ի իր միկրոբլոգում:

Հիշեցնենք, որ Բաքվի ծանր հանցագործությունների դատարանը Շիրակից 13 ռազմագերիների երեկ դատապարտել է 6 տարվա ազատազրկման՝ շինծու մեղադրանքներով: