Զելենսկին հայտարարել է, որ ռուսերենը Ռուսաստանի սեփականությունը չէ

Ուկրաինայի նախագահ Վլադիմիր Զելենսկին հայտարարել է, որ ռուսաց լեզուն Ռուսաստանի սեփականությունը չէ: Այս մասին նա ասել է «Ուկրաինա 30. հումանիտար քաղաքականություն» խորհրդաժողովում լրագրողների հետ զրույցում:

«Հիշեք, թե քանի չարաշահում է եղել, հարցը  բարձրացրել է Ռուսաստանը, որ եթե փողոցում ես ռուսերեն խոսեմ, ինձ կտուգանեն: Դա ճիշտ չէ: Բայց օրենքում որոշ նորմեր գրված են այնպես, որ հնարավորություն են տալիս խոսելու այդ մասին»,- ասել է նա։

Զելենսկին շեշտել է, որ ուկրաինացին չի տուգանվի, եթե ռուսերեն խոսի:

«Մենք դժվար իրավիճակում ենք, պատերազմում ենք, լարվածությունն առաջացնում է ցանկացած բան, որը կապված է Ռուսաստանի կամ ռուսաց լեզվի հետ: Թեև ես համարում եմ, որ ռուսաց լեզուն Ռուսաստանի սեփականությունը չէ»,- իր կարծիքը հայտնեց Զելենսկին:

Նա նաև ավելացրել է, որ այժմ չարժե բարձրացնել պետական լեզվի հարցը, քանի որ Ուկրաինայում այս ուղղությամբ ամեն ինչ արդեն արվել է օրենսդրական մակարդակով:

«Մենք ունենք ուկրաիներեն՝ միակ պետական լեզուն, որն ամրագրված է Սահմանադրության մեջ» - ամփոփել է նա:

Ավելի վաղ Զելենսկին, մեկնաբանելով ՌԴ նախագահ Վլադիմիր Պուտինի «Ուկրաինացի և ռուս ժողովուրդների միասնության մասին» հոդվածը, ասել էր․ «Հաճելի է, որ մարդը գիտի ուկրաիներեն լեզուն»: