Ռուսերենը Թուրքիայում երրորդ ամենատարածված լեզուն է

Ռուսաստանի Դաշնության դեսպանության քարտուղար և  մշակութային կցորդ Ալեքսանդր Սոտնիչենկոն, ելույթ ունենալով Իզմիրի Սեպտեմբերի 9-ը (1922 թ. թուրքերի կողմից Իզմիրի գրավման օրը) համալսարանի գրականության ֆակուլտետի դահլիճում, անդրադարձել է Ռուսաստան-Թուրքիա հարաբերություններին:

«Առևտուրն, իհարկե, շատ կարևոր է, բայց ինձ համար դա երկրորդական է: Քաղաքականությունը և մշակույթն ավելի կարևոր են` ըստ իս: Մենք շատ ուրախ ենք, որ այս համալսարանում կա «Ռուսաց լեզվի և գրականության» բաժին: Հատկապես զբոսաշրջության և առևտրի ոլորտում Թուրքիայում ռուսերենի իմացությունը շատ կարևոր է: Թուրքերենից և անգլերենից հետո ռուսերենն ամենատարածված լեզուն է: Թուրքիայում ամենաքիչը 100 հազար ռուս է ապրում»,- դիվանագետի խոսքերն է մեջբերում «Անադոլու» գործակալությունը: