Զելենսկին հայտարարել է Ուկրաինայի անվտանգության երաշխավոր երկրների հանդիպման մասին` առանց Ռուսաստանի

Ուկրաինայի նախագահ Վլադիմիր Զելենսկին վստահություն է հայտնել, որ երկրի անվտանգության ենթադրյալ երաշխավոր երկրների հանդիպումը «անպայման կկայանա»։ Նրա խոսքով՝ հանդիպման ընթացքում պետք է ընդհանուր ըմբռնում լինի անվտանգության երաշխիքների վերաբերյալ, և միայն դրանից հետո կհաջորդի հանդիպում Ռուսաստանի հետ։

Թուրքական Haberturk հեռուստաալիքին տված հարցազրույցում Զելենսկին թվարկել է այն երկրները, որոնք արդեն համաձայնել են հանդիպմանը՝ ԱՄՆ, Բրիտանիա, Թուրքիա, Լեհաստան, Գերմանիա, Ֆրանսիա և Իսրայել։ «Սրանք բոլոր երաշխավորները չեն…», - ասել է նա:

Ըստ Զելենսկիի՝ բանակցությունները կզարգացնեն անվտանգության երաշխիքների ընդհանուր ըմբռնումը։ Միայն այս հարցում միասնական դիրքորոշման հասնելուց հետո կկայանա ուկրաինական ներկայացուցիչների հանդիպումը ռուսական կողմի հետ։

Նա պարզաբանել է, որ անհրաժեշտ է նաև երաշխավորների հանդիպում, որպեսզի որոշվի Ուկրաինային տարբեր պետությունների օգնության աստիճանը։ Զելենսկին պարզաբանել է, որ իր նշած երկրներից մի քանիսը պատրաստ են Ուկրաինային տրամադրել անհրաժեշտ օգնությունը, մյուսները՝ միայն մասնակի։