ԵՄ-ն երկարացրել է պատժամիջոցները՝ կապված Ռուսաստանի կողմից Ղրիմի և Սևաստոպոլի բռնակցման հետ

Եվրամիությունը (ԵՄ) ևս մեկ տարով երկարաձգել է Ռուսաստանի կողմից Ղրիմի և Սևաստոպոլի ապօրինի անեքսիայի կապակցությամբ սահմանված պատժամիջոցները: Սահմանափակող միջոցառումները երկարացվել են մինչև 2022 թվականի հունիսի 23-ը. հայտնում է ԵՄ խորհրդի կայքը:

Ներկայումս կիրառվող պատժամիջոցները ներառում են Ղրիմում կամ Սևաստոպոլում արտադրվող ապրանքների՝ ԵՄ ներմուծման արգելքը, ներդրումներ, զբոսաշրջային ծառայություններ:

Արգելվում է Ղրիմ և Սևաստոպոլ արտահանել որոշակի ապրանքներ և տեխնոլոգիաներ, որոնք կիրառվում են տրանսպորտի, հեռահաղորդակցության և էներգետիկ արդյունաբերության մեջ, նավթի, գազի որոնման և արդյունահանման համար:

«ԵՄ-ն չի ճանաչում Ղրիմի և Սևաստոպոլի անօրինական բռնակցումը Ռուսաստանի Դաշնության կողմից և շարունակում է դատապարտել Ռուսաստանի կողմից միջազգային իրավունքի խախտումները` համաձայն Արտաքին գործերի և անվտանգության քաղաքականության գերագույն ներկայացուցչի՝ 2020 թ. մարտի 16-ի հայտարարության»,- ասվում է ԵՄ հայտարարության մեջ: