Իսրայելցիները տոնել են Նեթանյահուի հեռացումը

Իսրայելցիները տոնել են Բինյամին Նեթանյահուի հեռանալը վարչապետի պաշտոնից։ Նա երկիրը ղեկավարում էր ավելի քան 12 տարի:

Հազարավոր իսրայելցիներ հավաքվել են Թել Ավիվի Յիցակ Ռաբինի հրապարակում, երբ խորհրդարանը վստահության քվե է տվել նոր կոալիցիոն կառավարությանը:

Քաղաքացիները վանկարկել են՝ «Սա մեր երկիրն է, Նեթանյահուն չկա», «Ձերբակալեք Նեթանյահուին»: Հրապարակում կախված է եղել նաեւ նախկին վարչապետի լուսանկարը՝ «հանցագործ նախարար» մակագրությամբ: Այնուհետև քաղաքացիները երթով շարժվել են դեպի Հաբիմա հրապարակ, որտեղ մինչ առավոտ նշել են Նեթանյահուի հրաժարականը:

Հունիսի 13-ի նախօրեին իսրայելական ընդդիմության կողմից կազմված կոալիցիոն կառավարությունը վստահության քվե ստացավ Կնեսետից (խորհրդարան):

Այսպիսով՝ ավարտվեց «Լիկուդ» դաշինքի առաջնորդ Բինյամին Նեթանյահուի գլխավորած կաբինետի 12-ամյա կառավարումը: Նոր կաբինետը գլխավորում է Նաֆթալի Բենեթը:

Երկրի նոր կառավարությանը լիազորությունների փոխանցման արարողությունը նախատեսված է հունիսի 14-ին: