Բաղդադում ամերիկյան զինված ուժերի բազան հրթիռային հարձակման է ենթարկվել

Չորեքշաբթի երեկոյան Բաղդադի միջազգային օդանավակայանը հրթիռակոծման է ենթարկվել: Այս մասին հայտնել է Al-Hadas հեռուստաալիքը՝ վկայակոչելով Իրաքի անվտանգության ծառայության աղբյուրներ:

Պարզաբանվում է, որ հարձակման է ենթարկվել «Վիկտորիա» ռազմական ճամբարը, որտեղ գտնվում են ամերիկացի զինվորականները: Զոհերի ու ավերածությունների մասին, ըստ ՏԱՍՍ-ի, ոչինչ չի հաղորդվել:

Առնվազն երեք հրթիռ էլ ընկել է Բաղդադից հյուսիս գտնվող՝ Իրաքի ռազմաօդային ուժերի Բալադ բազայի վրա: Այստեղ տեղակայված են օտարերկրյա մասնագետներ, որոնք սպասարկում են իրաքյան F-16 կործանիչները, ինչպես նաև ԱՄՆ մասնավոր ռազմական ընկերության աշխատակիցներ: Զոհերի մասին տեղեկություն չկա։