ՀԱՄԱՍ-ը նշել է Իսրայելի հետ զինադադարը պահպանելու պայմանը

Պաղեստինյան դիմադրության կազմակերպությունը` ՀԱՄԱՍ-ը, կշարունակի զինադադարը Իսրայելի հետ, եթե այն չխախտվի հակառակակորդ կողմից: Այս մասին հայտարարել է ՀԱՄԱՍ-ի քաղբյուրոյի խոսնակը:

Նա պարզաբանել է, որ ՀԱՄԱՍ-ը տեղեկատվություն է ստացել միջնորդ Եգիպտոսից Գազայի հատվածում «փոխադարձ և միաժամանակյա զինադադարի մասին» համաձայնության վերաբերյալ: Այն պետք է սկսվի 2021 թվականի մայիսի 21-ի  առավոտյան 2-ին:

«Պաղեստինյան դիմադրությունը հավատարիմ կմնա այս համաձայնագրին, եթե օկուպանտները հավատարիմ մնան դրան»,- մեջբերում է «ՌԻԱ Նովոստին» ՀԱՄԱՍ-ի խոսնակի խոսքերը:

Ավելի վաղ Իսրայելի կառավարությունը հայտարարել էր հրադադարի մասին համաձայնության ձեռք բերման մասին:

Ըստ վերջին տվյալների՝ մայիսի 10-ին սրված հակամարտության ընթացքում սպանվել է 12 իսրայելցի և 232 պաղեստինցի, այդ թվում՝ 65 անչափահաս: