Reuters գործակալությանը հայտնի է դարձել Ռուսաստանի պետական պարտքի դեմ պատժամիջոցներ կիրառելու՝ ԱՄՆ ծրագրերի մասին

ԱՄՆ նոր հակառուսական պատժամիջոցները կներառեն սահմանափակումներ՝ կապված Ռուսաստանի Դաշնության ինքնիշխան պարտքի հետ: Այս մասին  չորեքշաբթի հայտնել է Reuters գործակալությունը՝ վկայակոչելով իր աղբյուրները:

Ըստ գործակալության՝ սահմանափակումները կարող են հայտարարվել հինգշաբթի:

The New York Times թերթի տեղեկություններով՝ ԱՄՆ նախագահ Ջո Բայդենը հրամանագիր կստորագրի, համաձայն որի՝ ռուսական պարտքային արժեթղթերով ամերիկյան բանկերի աշխատանքի սահմանափակումները կընդլայնվեն: Մասնավորապես՝ արգելք կդրվի ամերիկյան ֆինանսական հաստատությունների կողմից պարտքերի արժեթղթերի գնման վրա ուղղակիորեն Ռուսաստանի Դաշնության Կենտրոնական բանկից, Ռուսաստանի Դաշնության ֆինանսների նախարարությունից և նրա սուվերեն հիմնադրամից: Պարբերականի համաձայն՝ սահմանափակող միջոցները կարող են ուժի մեջ մտնել հունիսի 14-ից: