Թուրքիայի ԱԳՆ–ն գնահատել է Ռուսաստանի՝ ավիահաղորդակցությունը սահմանափակելու որոշումը

Թուրքիայի արտաքին գործերի նախարար Մևլյութ Չավուշօղլուն ասել է, որ ինքը քաղաքական շարժառիթ չի տեսնում Ռուսաստանի՝ օդային հաղորդակցության սահմանափակման որոշման մեջ, բայց բացասական հետևանքներն անխուսափելի են:

«Մենք աշխատում ենք թռիչքների վերսկսման ուղղությամբ», - ըստ NTV հեռուստաալիքի՝ հավելել է դիվանագետը։

Երկուշաբթի հայտնի դարձավ, որ Ռուսաստանը ապրիլի 15-ից հունիսի 1-ը կդադարեցնի չարտերային և կանոնավոր թռիչքները դեպի Թուրքիա: Բացի այդ՝ տուրօպերատորներին խորհուրդ է տրվել առայժմ Թուրքիա շրջագայությունների փաթեթներ չվաճառել:

Նշվում էր, որ պատճառը Ուկրաինայի նախագահ Զելենսկիի՝ Թուրքիա կատարած այցն է, սակայն Կրեմլը հայտարարել էր, որ դրա պատճառը Թուրքիայում կորոնավիրուսի իրավիճակի վատթարացումն է։